Sáuð þið hana systur mína
Sáuð þið hana systur mína
sitja lömb og spinna ull?
Fyrrum átti ég falleg gull;
nú er ég búinn að brjóta og týna.
Einatt hefur hún sagt mér sögu;
svo er hún ekki heldur nísk:
hún hefur gefið mér hörpudisk
fyrir að yrkja um sig bögu.
Hún er glöð á góðum degi
- glóbjart liðast hár um kinn -
og hleypur þegar hreppstjórinn
finnur hana á förnum vegi.
Jónas Hallgrímsson
